Macron në Bundestag: Bota në kaos, të jemi të bashkuar

Macron në Bundestag

Presidenti francez Emanuel Macron kërkoi lidhje më të forta mes vendit të tij dhe Gjermanisë, duke thënë se Evropa e ka për detyrë të parandalojë rrëshqitjen e botës në kaos.

Macron vizitoi Berlinin me rastin e ditës së përkujtimit të viktimave të luftës. Në një fjalim në parlamentin gjerman, kreu i Elizesë deklaroi se Evropa nuk duhet të bëhet një lodër e fuqive të mëdha.

Macron gjatë ceremonisë përkujtimore në Berlin 

“Ka shumë fuqi që duan të na pengojnë, të cilat ndërhyjnë në debatet tona publike ,sulmojnë demokracitë tona liberale dhe përpiqen të na kthejnë kundër njëri-tjetrit. Dhe në këtë rend global, të cilin ne e marrim shumë seriozisht, fuqia jonë mbështetet tek uniteti”, deklaroi Macron në Bundestag.

Kjo nuk është hera e parë që numri një i Parisit bën deklarata të tilla që në mënyrë indirekte i referohen presidentit amerikan Donald Trump. Ky i fundit reagoi ashpër në rrjetin social Twitter javën e kaluar kur Macron e cilësoi nacionalizmin një tradhti ndaj patriotizmit.

Trump dhe Macron, një marrëdhënie e vështirë

Macron do që Bashkimi Evropian të jetë më i integruar, me një buxhet të përbashkët Eurozone. Ai kërkon gjithashtu mbështetjen e Gjermanisë për një ushtri evropiane, e cila sipas tij do të reduktojë varësinë e bllokut ndaj Shteteve të Bashkuara.

Kancelarja Angela Merkel ka shprehur pëlqimin e saj ndaj disa ideve, por të tjerat janë kontroverse në Berlin. Liderët francezë e gjermanë u takuan për bisedime pas fjalimit të Macron, ku diskutuan për migracionin dhe bashkëpunimin në fushën e mbrojtjes.

Shkarkoni aplikacionin e A2 CNN