Fitojnë ‘jelekverdhët’, taksa hiqet nga buxheti – A2

Fitojnë ‘jelekverdhët’, taksa hiqet nga buxheti

Zemërimi popullor gjunjëzon qeverinë franceze, e cila u detyrua të tërhiqet përfundimisht nga rritja e taksës së karburanteve.

Një ditë pasi njoftoi pezullimin gjashtë mujor të vendimit, kryeministri Eduard Philippe tha se rritja e taksës ishte hequr nga projektligji i buxhetit për vitin 2019-të.

‘Nëse shteti do të mbetet i fortë e i qëndrueshëm ai duhet të jetë mbi të gjithë garantuesit e rendit publik. Kjo është e nevojshme për një qeverisje të mirë. Ashtu siç thashë dje, asnjë taksë nuk vlen, nëse ajo rrezikon unitetin e vendit”, deklaroi kryeministri francez.

Kryeministri francez Eduard Philippe

Philippe deklaroi para dhomës së ulët të parlamentit se qeveria ishte e gatshme për dialog. Më herët kryeministri njoftoi gjithashtu pezullimin e rritjes së çmimit të gazit natyror dhe elektricitetit.

Ky konsiderohet një hap i madh prapa për qeverinë e presidentit Emanuel Macron, i cili ka thënë se masat janë të nevojshme për të luftuar ndryshimet klimatike dhe për përmbushjen e objektivave për reduktimin e deficitit në buxhet.

Nga revolta në Paris

Protesta e jelekëve të verdhë ka prekur qytetet më të mëdha franceze përgjatë tre fundjavave të fundit. E nisur fillimisht si pakënaqësi ndaj rritjes se çmimit të naftës, ajo u kthye shpejt në revoltë të dhunshme kundër kostove të larta të jetesës.

Katër persona kanë humbur jetën që prej nisjes së trazirave. Manifestime të tjera janë planifikuar këtë fundjavë.