Ukraina i ka dhënë fund tre shekujve dominim nga Kisha Ortodokse Ruse duke krijuar Kishën e saj Autoqefale këtë të shtunë.
Mijëra vetë u mblodhën para Katedrales së Shën Sofisë në Kiev ku liderët fetarë u takuan për të zyrtarizuar ndarjen, e cila ishte miratuar që në tetor edhe nga Patriarkana e Stambollit. Vendimi ka tërbuar Kishën Ruse e cila madje shkoi deri aty sa të paralajmëronte për ndarje totale nga Stambolli.
Kisha Ortodokse Ruse ishte “gardiane shpirtërore” e asaj ukrainase prej 332 vitesh, por ndarja vjen më tepër për shkak të problemeve politike se sa fetare, sidomos pas aneksimit të Krimesë nga ana e Rusisë në vitin 2014.