Partia Demokratike do të marrë pjesërisht pjesë në punimet e Kuvendit, kështu është vendosur në mbledhjen e grupit parlamentar të mbyllur vetëm pak minuta më parë.
Sipas asaj që ka mësuar A2, kryetari i PD, Lulzim Basha, ka deklaruar se në të gjithë komisionet ku diskutohen çështje me ndjeshmëri të lartë për qytetarët, edhe deputetët e PD do të jenë të pranishëm.
Komisioni i parë ku do të marrë pjesë opozita është ai i medias, ku do të kërkohet anulimi i ligjit të arsimit të lartë.
“Arsimi në Shqipëri është në kolaps total. Duhet të angazhojmë gjithë kapacitetet tona për arsimin. Duhet të jemi të qartë. Qëndrimi ynë është anulimi i ligjit të arsimit të lartë”, mësohet t’i ketë thënë Basha deputetëve.
Ai gjithashtu ka kërkuar që për platformën e arsimit të lartë të angazhohen ish-ministra të PD, deputetët dhe pedagogë.
Në komisione sot do të jenë të pranishëm edhe deputetët e Lëvizjes Socialiste për Integrim. Por sa i përket ligjit të arsimit të lartë, nëse PD kërkon anulimin e plotë të tij, LSI kërkon ndryshimin.