“Një gjë është e sigurt: ne kemi ligjin e shenjtë dhe dhimbjen e këtyre njerëzve, të cilët po ashtu janë të shenjtë. Kështu që puna jonë do të bëhet”.
Kjo është përgjigja e Genta Sulës, pak minuta pasi lajmi se Bujar Sheshi kishte paditur institucionin që drejton.
Kryetarja e autoritetit për hapjen e dosjeve të ish-Sigurimit të Shtetit, këmbëngul se rezultati i kërkimit është i saktë dhe ndryshe nga sa zoti Sheshi pretendon, nuk ka sajesa apo prapavija politike.
“Për organet e larta të drejtësisë kemi verifikuar rreth 550 figura dhe prej tyre 4 janë gjetur me probleme në dokumentet e sigurimit. Nga 1500 figura, rreth 30 janë gjetur me probleme. Te ne është vetëm ligji dhe procesi”, tha Sula.
Autoriteti për 3 muaj kërkoi në dosjet e Sigurimit të Shtetit, ku anëtari i KLP-së figuronte si bashkëpunëtor. Iu drejtua 2 herë zyrave të gjendjes civile në Tiranë dhe gjimnazit që prokurori kishte frekuentuar. Rezultati ishte e njëjtë.
“Në përputhje me rekordet e tjera, të verifikuar edhe nga drejtoria e përgjithshme e gjendjes civile, kemi pasur një shkresë zyrtare, ku thuhet se me emrin e personit në fjalë nuk figuron asnjë person tjetër, shprehet Skënder Vrioni.
Problem në rastin e Bujar Sheshit, krahas një mbiemri të dytë, (Shisha) ishte dhe paqartësia në atësi. Por autoriteti pohon se disponon shkresa zyrtare që konfirmojnë se bëhet fjalë për të njëjtin person.