Presidenti Ilir Meta ka reaguar zyrtarisht mbi projektin e “Unazës së Re”, pasi priti sot një delegacion të banorëve të prekur në zonën e Astirit nga projekti i Unazës së Madhe.
Presidenti dëgjoi ankesat e banorëve dhe më pas theksoi se ka ndjekur “me shumë shqetësim dhe vëmendje maksimale” zhvillimet e ngjarjes.
Pak pas takimit Presidenca doli me një qëndrim zyrtar, shumë i gjatë dhe të detajuar, ku thuhet se duke marrë parasysh faktin se ka kaluar më shumë se 75 ditë nga kërkesa fillestare e Presidentit, dhe Institucionet “ende nuk kanë kthyer një përgjigje mbi informacionin e kërkuar”, kërkon të “merren masa të menjëhershme”.
Në veçanti, Meta kërkon anulimin e Projektit për “Rehabilitimin e segmentit rrugor mbikalimi i Pallatit me Shigjeta – Rrethrrotullimi i sheshit “Shqiponja”, anulimin e “çdo procedurë prokurimi që po realizohet bazuar në projektin ekzistues me qëllim ruajtjen e financave publike”, pezullimin e "çdo procedure shpronësimi për interes publik" si dhe nisja e procedurave “me garë të hapur për të realizuar një Projekt të Ri, i cili do të duhet të ofrojë zgjidhjen më të mirë teknike për zhvillimin urban të Tiranës”.
Nuk ka munguar reagimi në rrjetet sociale të kryeministrit Edi Rama, i cili përmes një postimi në Twitter deklaron që “e vërteta është se IM është drejtuesi më serioz i opozitës. Kushtetutën e lexon njësoj si ata. Qeverinë e urren njësoj si ata. Rrëmujën e uron njësoj si ata. Po ndryshe nga ata, ai i ul vartësit të mbushin çarçafë me dokrra "ligjore" dhe budallallëkut i del për zot pa pikën e galjes ”.