Thaçi: Kërkova vazhdimin e dialogut, SHBA tha “jo” – A2

Thaçi: Kërkova vazhdimin e dialogut, SHBA tha “jo”

Presidenti i Kosovës, Hashim Thaçi u kthye me porosi të qarta nga udhëtimi i tij në Shtetet e Bashkuara të Amerikës. Në një konferencë për shtyp tregoi se kishte kërkuar që dialogu me Serbinë të rifillonte pa pezullimin e taksës 100% kundër mallrave serbe, por Uashingtoni e refuzon kategorikisht këtë.

“Vendimet e Kuvendit të Kosovës duhet të respektohen nga të gjithë. Është e padrejtë nga ana e Serbisë që kushtëzojë dialogun. Unë kam kërkuar në Uashington vazhdimi i dialogut pa pezullimin e taksës, por përgjigja ka qenë jo”, theksoi presidenti Thaçi.  

Presidenti nënvizoi se vendimi për pezullimin e taksës i takon qeverisë, duke shtuar se në shikim të parë duket që Serbia po dëmtohet në ekonomi, por sipas tij marrëdhëniet me SHBA-të nuk paguhen me asnjë çmim.

Ai më tej u shpreh kundër propozimit të kryeministrit, Ramush Haradinaj për organizimin e një Konference Ndërkombëtare për arritjen e marrëveshjes së pajtimit mes Kosovës dhe Serbisë.

Sipas Thaçit, një zhvillim i tillë do të sillte Rusinë në tryezën e negociatave dhe për pasojë Kosova mund të shndërrohej në një Republikë Serbe. Në fund ai ripërsëriti se duhet të përcaktohet kufiri mes Kosovës dhe Serbisë që të ndodhë njohja ndërkombëtare.

Shkarkoni aplikacionin e A2