Mungesa e vitaminës D, mjekët: Protokoll të ri mjekimi, kryeni analizën

Mungesa e vitaminës D në organizëm është një problem shëndetësor global. Shumë vende  kanë ndryshuar protokollet e mjekimit  për të ulur mungesat  dhe pasojat në shëndet. 

Në  Shqipëri e ashtuquajtura “vitamina e diellit” jepet vetëm në vitin  e parë të jetës në konsultoret e qendrave shëndetësore.

Mjekët pediatër propozojnë ndryshimin e protokollit të mjekimit  me vitaminën D për shkak të pasojave  komplekse në shëndet.

Pediatrja Vjollca Pallaveshi

Sipas pediatres Vjollca Pallaveshi, “mungesa e vitaminës D tek fëmijët është problematikë e madhe, në vendet me 320 ditë diell merret deri në 5 vjeç,  tek ne fëmija e merr nga 1 deri në 2 vjeç, vendos mjeku. Vitamina ndikon në sistemin imunitar dhe kardiovaskular, nervin okular etj”.

Në vendin tonë nuk ka studime të mirëfillta për  mungesën e vitaminës D dhe sëmundshmërinë në popullatë.  Niveli i saj në organizëm mund të matet vetëm përmes një analize gjaku.

Mjekja Valbona Fazlli

Mjekët rekomandojnë  kontrollin e vitaminës D në gjak veçanërisht tek fëmijët dhe moshat e treta.

“Çdo pacient duhet të verifikojë a ka mangësi të vitaminës D, dhe kjo falë një analizë të thjeshtë gjaku, që kryhet brenda ditës”, thotë mjekja Valbona Fazlli.

Mundësia më e mirë për përthithjen e vitaminës D është ekspozimi i lëkurës në diell.

 Por ndryshimi i stilit të jetës, ka bërë që dhe popullsia shqiptare të vuajë nga problemet shëndetësore dhe pse jemi një vend me rreth 300 ditë diell në vit.

Shkarkoni aplikacionin e A2 CNN