Në paraqitjen e tij të parë në komisionin e sigurisë mbi raportin vjetor të Shërbimit për Çështjet e Brendshme dhe Ankesat, deputetët i kërkuan Muhamet Rrumbullakut që institucioni që ai drejton të kryejë verifikime mbi shkarkimet e fundit ne polici.
Vetëm pak kohë më parë nga detyra u lirua drejtori i Policisë së Tiranës i cili pasoi me një sërë largimesh të tjera në drejtoritë kryesore të vendit si Vlora, Fieri por edhe Durrësi, me largimin e drejtoreshës se Policisë kufitare.
Por, për kreun e SHÇBA, institucioni që ai drejton ka nevojë për rritje të kapaciteteve. “Kërkohet t’i jepet rëndësi rritjes së kapaciteteve të burimeve njerëzore, për njohjen e gjendjes dhe zhvillimit të hetimit proaktiv ndaj fenomeneve kriminale ku implikohen subjektet e këtij shërbimi”, u tha Rrumbullaku deputetëve.
Gjatë komisionit, i cili u zhvillua me dyer të mbyllura, mësohet se Rrumbullaku ka kërkuar që SHÇBA të jetë e pavarur në mënyrë që të mos ndikohet politikisht siç ka ndodhur në të kaluarën. Për sa i përket vetting-ut ai tha para deputetëve të mazhorancës se kryerja e tij për efektivët bazë nga SHÇBA ul ndjeshëm kostot.