Ish-Presidenti Moisiu: Përsëritja e ’97-s do të ishte krim

Ish-Presidenti i Republikës, Alfred Moisiu, komentoi gjendjen në të cilën ndodhet vendi për A2 CNN, si edhe kërcënimin e Presidentit Meta për dorëheqje. “Me Kushtetutë, Presidenti përgjigjet për unitetin e kombit, duhet të luftojmë t’i bëjmë bashkë politikanët tanë, megjithëse është shumë e vështirë”, u shpreh ish-Presidenti.

“Do të përsërisim prapë 1997-n, që erdhi operacioni Alba për të zgjidhur krizën? Kjo nuk shkon, do të ishte një krim ndaj vendit tonë. Është e drejta e Presidentit të gjykojë, të vendosë, por unë gjykoj se duhen bërë përpjekjet maksimale për të ulur njerëzit në tryezë.

Sipas Moisiut, dorëzimi i mandateve nga ana e deputetëve të opozitës ishte gabim pasi ka një mënyrë që vërteton pretendimet e opozitës, zgjedhjet vendore të programuara për t’u mbajtur në 30 qershor. “Djegien e mandateve e quaj të pavend, të shpejtuar dhe jo të menduar mirë. Ndërsa çështjen e mospjesëmarrjes në zgjedhje e quaj të gabuar. Zgjedhjet vendore do të japin një pasqyrë të gjendjes dhe nëse shumica dështon, atëherë duhet që të shkojmë në zgjedhje të parakohshme”, shtoi Moisiu.

Shkarkoni aplikacionin e A2 CNN