Erdogan ndryshon mendje, Hagia Sophia do të kthehet në xhami

Një prej godinave më përfaqësuese të Stambollit, Hagia Sophia, do të kthehet në xhami, të paktën kështu ka deklaruar Presidenti i Turqisë Recep Tayyip Erdogan, ndërkohë që këtë fundjavë në vend do të mbahen zgjedhjet vendore.

Hagia Sophia, e quajtur në turqisht Ayasofya, në të shkuarën ka qenë kishë por edhe xhami. Për rreth 900 vjet – pasi u ndërtua në vitin 537 nga Perandori Bizantin Justiani – godina ka shërbyer si katedrale ortodokse. Nga viti 1453 deri në vitin 1931, ishte një prej xhamive më madhështore të botës islame, nën drejtimin e Perandorisë Osmane.

Në vitin 1934, Hagia Sophia u kthye në muze me një dekret Mustafa Kemal Ataturk, themeluesit të shtetit modern turk. Statusi shekullar ka bërë që vizitorë të të gjitha feve të shijojnë godinën e mrekullueshme.

Shpesh, komuniteti mysliman organizon ceremoni fetare atje, një veprim që ka sjellë edhe tensione me të krishterët. Por të mërkurën, Erdogan tha për herë të parë që kthimi i Hagia Sophia-s në muze ishte një gabim shumë i madh. Statusi i godinës do të diskutohet pas zgjedhjeve.

Nuk është hera e parë që Erdogan flet për këtë temë. Në vitin 2013 ai pati deklaruar se nuk do të merrte në konsideratë ndryshimin e statusit të Hagia Sophia-s, por shtoi se kishte një kërkesë gjithnjë e më të madhe nga populli turk që ajo të bëhej sërish xhami.

Shkarkoni aplikacionin e A2 CNN