Haradinaj i përgjigjet Kurtit: Çakorri dhe Kulla janë pjesë e Kosovës, disa duhet të skuqen nga gjërat që thonë

HARADINAJ SULMET frame 1653 1100x620

Iu deshën disa ditë për t’iu kundërpërgjigjur akuzave të ashpra të opozitës. Kryeministri, Ramush Haradinaj tha se me demarkacionin me Malin e Zi, Kosova nuk ka humbur territor.

Shefi i qeverisë së Prishtinës tha se kushdo që shkon drejt kësaj rruge e ka gabim.

 “Nuk është falë Çakorri as Kulla, gënjeshtër është, krejt ata që gënjejnë e dinë që janë duke gënjyer. Por e bëjnë për arsye të ulëta. Nuk do të lejojmë të ndahet Kosova as të preken kufijtë e Kosovës, as toka e Kosovës, as territori, kush shkon asaj rruge e ka gabim, qoftë vëlla i yni qoftë tjetër”, tha Haradinaj.

Haradinaj kritikoi sulmet e liderit të Vetëvendosjes, Albin Kurti, për të cilat tha se vijnë në një kohë kur Kosova po përballet me Serbinë.

 “Ata që po koriten shumë e kanë për vete, por do të vijë dita kur shumica prej tyre kanë me u skuq për ato që po i bëjnë që janë të padrejta, në kohën kur jemi duke u  përballur me Serbinë, me agjendat e Vucicit, me planet e tij për të ndarë Kosovën, me planet e ndërkombëtarëve tjerë me na e ulë kokën, goditjet që vijnë nën brez vëllezërve e motrat tona nuk janë në rregull”, deklaroi kryeministri i Kosovës.

Ndër të tjera Haradinaj theksoi se ndërkombëtarët nuk kanë aleat më të fortë se shqiptarët në Ballkan, pasi është një popull properëndimor euroatlantik.