Pas firmosjes së marrëveshjes me aleatët, kreu i Partisë Demokratike, Lulzim Basha, tha se tashmë është formësuar shumica e re.
“Duhet t’i japim fund krimit elektoral dhe zgjedhjeve false. Synimi i parë i koalicionit është që mazhoranca e re politike, morale, numerike e Shqipërisë, është që të kthejë vendimmarrjen në duart e shqiptarëve”, u shpreh Basha.
“Angazhohemi po kështu që të çojmë përpara Reformën në Drejtësi, duke nisur nga formimi i Gjykatës Kushtetuese, funksionimin e Gjykatës së Lartë dhe Prokurorisë. Për këtë është e domosdoshme të ndëshkohet krimi elektoral, që prodhoi një qeveri armike të qytetarëve. Zgjedhje farsë në Shqipëri nuk do të ketë pa u ndëshkuar krimi elektoral, pa u vënë para përgjegjësisë Edi Rama me Vangjush Dakon e Damian Gjiknurin”.
Sipas kreut të PD, kjo marrëveshje nuk ka vetëm qëllim realizimin e të zgjedhjeve të lira e të ndershme, por ka një synim më madhor. “Marrëveshja opozitare nuk është thjesht një konfirmim i mazhorancës së re politike, morale, numerike. Misioni ynë është më i madh, t’i japim fund tranzicionit”, shtoi Basha.
“Bindja” e Bashës: Nuk do të ketë opozitë false
Kryetari i Partisë Demokratike Lulzim Basha komentoi edhe krijimin e “Bindjes Demokratike”, partisë më të re opozitare të regjistruar nga Astrit Patozi këtë të martë, që do të marrë pjesë në zgjedhjet e 30 qershorit.
“Gjeneza e të keqes ku ndodhemi ku ndodhemi janë zgjedhjet e organizuara nga krimi. Prandaj nuk do të ketë më zgjedhje false, nuk do të ketë më Parlament fals, nuk do të ketë më Qeveri false, nuk do të ketë më drejtësi false e natyrisht që nuk do të ketë më opozitë false”, u shpreh Basha.