Qirko për A2 CNN: Shkrimtarja e “50 Hijet e Greit” krijon perceptim negativ për shqiptarët

Autorja e sagës erotike, “50 Hijet e Greit”, Erika Leonard James, është përballur më kritika për mënyrën se si i përshkruan shqiptarët në librin e saj të ri. Ambasadori shqiptar në Londër, z. Qirjako Qirko, reagoi gjatë fundjavës për shtypin britanik, duke thënë se libri i ri i autores, “The Mister”, i portretizon bashkatdhetarët e tij si primitivë dhe kriminelë, duke krijuar perceptime negative.

Në një prononcim për A2 CNN, z. Qirko tregon arsyet që e shtynë të ngrinte zërin lidhur më rastin, konsideruar edhe faktin se në Britaninë e Madhe perceptime të tilla janë gjithnjë e më të theksuara.

“Përshkrime të tilla, pavarësisht se përbëjnë paragrafë në librin e shkrimtares, krijojnë perceptime negative për Shqipërinë, shqiptarët, për meshkujt shqiptarë në veçanti. Dhe është detyra ime si ambasador që të reagoj në mënyrën e duhur nëpërmjet mediave”

Qirjako Qirko, Ambasador i Shqipërisë në Londër.

Polemikat kanë të bëjnë më personazhin e një pastrueseje shqiptare të quajtur Alesia Demaçi, viktimë e bandave dhe trafikimit për qëllime seksuale. Ndërsa nis një lidhje me një aristokrat anglez, ajo mrekullohet ndaj atyre që i quan telefona të zgjuar, dhe kartat magjike që i dashuri përdor për tërheqjen e parave. Mediat britanike flasin për një përplasje diplomatike, por për ambasadorin këto janë konstatime të ekzagjeruara.

“Nuk është reagim i ashpër, është një reagim krejt normal të cilin e bën çdo diplomat, çdo ambasador kur flitet për vendin e tij”

Qirjako Qirko, Ambasador i Shqipërisë në Londër

Raportet për rritje të kriminalitetit dhe aktivitetit të bandave shqiptare në Britaninë e Madhe, ambasadori i cilëson si jorealiste.

“Në Britaninë e Madhe jetojnë sot mbi 120 mijë shqiptarë dhe numri i personave të angazhuar në veprimtari të jashtëligjshme është tepër i kufizuar”.

Qirjako Qirko, Ambasador i Shqipërisë në Londër
Shkarkoni aplikacionin e A2