Përforcim i bujshëm për përfaqësuesen kosovare të futbollit. Florent Hadërgjonaj vendosi të braktisë Zvicrën, për të luajtur me ekipin e drejtuar nga Challendes.
Lojtari i Huddersfield në Premier League, u pajis me pasaportën e Kosovës, duke bërë zyrtare edhe zgjedhjen e tij. Për të takuar futbollistin e krahut të djathtë në këtë moment special, i pranishëm ishte edhe presidenti i Federatës së Kosovës, Agim Ademi.
Hadërgjonaj, i cili luan si mbrojtës i djathtë, iu bashkua Huddersfield-it në gusht 2017, fillimisht në huazim, ndërsa në korrik 2018 lëvizja u bë e përhershme. Në total ai ka luajtur 67 ndeshje me klubin anglez. Por me vetëm 15 pikë të mbledhura këtë sezon, nga gushti skuadra e Hadërgjonajt do të luajë në kategorinë e dytë angleze.