Me nderime ushtarake u soll në Rinas trupi i pajetë i majorit Klodian Tanushi. Ai nuk mundi t’u mbijetonte më tepër se 4 ditë plagëve të rënda që mori gjatë shpërthimit të 6 majit në Letoni. Në ceremoninë ushtarake, të organizuar në aeroportin e Rinasit ndodheshin Ministrja e Brendshme, Shefi i Shtabit, prindërit e të ndjerit, bashkëshortja, djali dhe kolegët.
Por ushtarët e NATO-s në Riga, ashtu siç vepruan edhe me rastin e Zarife Hasanajt, organizuan një ceremoni të denjë për kolegun e tyre shqiptar Tanushi, duke e përcjellë me nderime të shumta nga aeroporti i kryeqytetit letonez. Homazhet për majorin do të zhvillohen të enjten te Muzeu Kombëtar dhe më pas do të përcillet në Varrezat e Dëshmorëve.
Ai humbi jetën më 10 maj. Fillimisht mbeti i plagosur rëndë duke çmontuar predha të kalibrit të madh në kampin Adazi, ku së pari ndërroi jetë nëntetare Zarife Hasanaj dhe u plagos efektivi tjetër Julian Kapaj. Në hetimet atje, përveç ushtrisë vendase dhe të NATO-s, merr pjesë policia dhe prokuroria lokale si dhe një grup specialistësh shqiptarë të Ministrisë së Mbrojtjes.