Milano “dashurohet” me shqiptarët. Ofertë e Interit për Hysajn, Tare drejt Milanit

Shqiptarët janë në modë në futbollin italian. Prej vitesh protagonistë në Serinë A, ashtu edhe një kategori më poshtë, por së fundmi në listën e dëshirave të klubeve më të mëdha përtej Adriatikut.

Elseid Hysaj është emri i “nxehtë” i merkatos. Sipas gjasave, ylli kuqezi do të largohet nga Napoli pas marrëdhënies së vështirë me Ançelotin. Interesi për mbrojtësin është i madh nga Italia, Anglia dhe Spanja, me Interin që duket në avantazh.

Me kthimin e Vrsaljkos te Atletico Madrid, zikaltërit janë në kërkim të një lojtari për krahun e djathtë. Administratori i Interit, Beppe Marotta ka piketuar Hysajn si alternativën e parë, e madje, sipas mediave italiane, Interi ka bërë një ofertë zyrtare te Napoli për të nisur negociatat.

Kjo lidhet edhe me faktin se për Hysajn interesohen edhe Chelsea e Arsenali në Angli, me lojtarin që është vëzhguar edhe nga Atletico Madrid. Çmimi për mbrojtësin shqiptar është 25 milionë euro, shifër e përballueshme nga klubet e interesuara.

Një tjetër shqiptar për të cilin po flitet shumë në Milano është edhe Igli Tare. Drejtori sportiv i Lazios, i cili është vlerësuar disa herë në vitet e fundit si më i miri në këtë rol drejtues në kampionatin italian, është objektivi i Milanit.

Pas largimit të trajnerit Gattuso dhe të drejtorit teknik, Leonardo, ish-kapiteni i Shqipërisë është i pari në listën e kandidatëve të klubit kuqezi. Shefi ekzekutiv i Milanit, Ivan Gazidis e pëlqen për faktin se Tare ka konfirmuar aftësitë për të evidentuar lojtarë të rinj, duke i shitur më pas me çmime mjaft të larta, por edhe sepse 45-vjeçari do të vazhdonte bashkëpunimin mjaft të mirë me Simone Inzaghi-n, kandidatin potencial për stolin e “Djallit”.

Shkarkoni aplikacionin e A2