Ambasadori i Kosovës në Tiranë: Iku koha për Serbinë e madhe, po kthehet në pengesë

Sylë Ukshini, ambasadori i Kosovës në Tiranë, ishte i ftuar në Ditarin e orës 09:00 në A2 CNN, nga ku foli për progres-raportin e publikuar për Kosovën, por edhe për marrëdhëniet e Prishtinës me Beogradin.

Sa i përket liberalizimit të vizave, Ukshini u shpreh se raporti konstaton se Kosova i ka përmbushur kushtet për liberalizimin e vizave. “Raporti i vlerësimit njeh arritjet e Kosovës dhe konstaton se ka përmbushur kushtet për të qenë pjesë e zonës Shengen. Do të ishte mirë që tani të kishte një rekomandim. Ne po mbesim të fundit, të paktën duhet të ketë një liberalizim vizash. Është vendi i vetëm në Europë që nuk ka liberalizimin e vizave. Ky proces është frenuar padrejtësisht. Nëse do të hapej porta, do të bëheshin përparime të tjera”, tha Ukshini.

Më tej, ambasadori i Kosovës në Tiranë foli edhe për rrugën e vështirë të marrëveshjes mes Prishtinës dhe Beogradit. “Sjella e Serbisë ndaj Kosovës ka qenë agresive. Serbia arreston në mënyrë arbitrare shumë kosovarë. Gishti ose pengesa në bashkëpunimin rajonal duhet të drejtohet nga Serbia. Kosova ka bërë shumë lëshime kur ka hyrë në dialog me Serbinë. Ka ikur koha për të krijuar Serbinë e madhe”, tha ambasadori i Kosovës në Tiranë.

Shkarkoni aplikacionin e A2