Sulmi ndaj cisternave, Uashingtoni shfaq videon që implikon Iranin

Ushtria amerikane publikoi një video, ku pretendon se shfaqet Garda Revolucionare iraniane teksa zhvendos një minë të pashpërthyer, në anë të cisternës së naftës që u sulmua në gjirin e Omanit ditën e enjte. Zyrtarët amerikan treguan gjithashtu një foto të cisternës japoneze që duket se tregon minën e pashpërthyer para se të zhvendosej. Në sulm u dëmtua gjithashtu një anije cisternë norvegjeze.

Shtetet e bashkuara akuzojnë Iranin për ngjarjen, ndërsa ky i fundit i mohon kategorikisht pretendimet.

“Shtetet e Bashkuara vlerësojnë se Republika Islamike e Iranit është përgjegjëse për sulmet. Ky vlerësim bazohet në të dhëna të inteligjencës, tek armët e përdorura, niveli i nevojshëm i ekspertizës për të realizuar operacionin dhe fakti se asnjë grup tjetër që operon në zonë nuk i ka resurset dhe aftësinë për të ndërmarrë një akt të tilla kaq të sofistikuar”, deklaroi Mike Pompeo.

Në një deklaratë të publikuar të premten, misioni iranian në organizatën e Kombeve të Bashkuara tha se i dënonte pretendimet në termat më të ashpër të mundshme. Shpërthimet ndodhën një muaj pasi 4 cisterna u dëmtuan në një sulm praj brigjeve të Emirateve të Bashkuara Arabe. Uashingtoni fajësoi Iranin edhe në këtë rast, por nuk ofroi prova. Çmimi i naftës u rrit me 4 për qind pas incidentit të së enjtes në Gjirin e Omanit, i cili shtrihet në fundin e një itinerari kyç detar, ku kalon çdo vit, një sasi nafte prej qindra milionë dollarësh. 

Shkarkoni aplikacionin e A2 CNN