Basha në rrezik? PD: Shantazh i Lleshajt, Meta thërret kreun e SHISH

Sekretari i përgjithshëm i Partisë Demokratike, Gazment Bardhi, i ka dërguar një letër ministrit të brendshëm Sandër Lleshaj, për t’i kërkuar shpjegime mbi pretendimet e këtij të fundit se kreu i Partisë Demokratike Lulzim Basha është në rrezik.

Sipas Bardhit, Lleshaj është takuar në datë 14 qershor me Feim Dollapajn, punonjës të Gardës së Republikës, me detyrë truprojë i Bashës, të cilit i ka komunikuar se ka “informacione të tërthorta dhe të besueshme” se Basha është në rrezik dhe pret një përgjigje nëse ai vlerëson se i nevojiten masa shtesë sigurie.

Bardhi e quan këtë takim si një përpjekje për shantazh që i bëhet kreut të opozitës dhe i kërkon ministrit të Brendshëm që të bëjë publike informacionet që ai ka në lidhje me rrezikun që i kanoset kreut të PD.

Pas publikimit të letrës dërguar ministrit Lleshaj nga ana e Partisë Demokratike, Presidenti i Republikës, Ilir Meta, mësohet se ka thërritur në takim kreun e Shërbimit Informativ Kombëtar, Helidon Bendo, por edhe komandantin e Gardës së Republikës, Gramos Sako, për më shumë informacion nëse i rrezikohet jeta kreut të PD, Basha.

Takimi ka përfunduar pak pas mesdite, por nuk mësohen detaje lidhur me informacionet që dy drejtuesit i kanë dhënë Presidentit Meta.

Shkarkoni aplikacionin e A2