OSBE: Nxitësit e dhunës të mbajnë përgjegjësi ligjore

Prezenca e OSBE-së në Shqipëri përmes një deklarate për mediat ka shprehur qëndrimin e saj për situatën e krijuar në disa qytete të vendit, ku mbështetës të opozitës janë përleshur me Policinë në përpjekje për të penguar hapjen e qendrave të votimit apo prishjen e materialeve zgjedhore.

OSBE dënon me forcë sulmet e dhunshme të këtyre ditëve kundër organeve përgjegjëse për organizimin e zgjedhjeve, në disa bashki në Shqipëri. Të gjitha proceset politike dhe administrative duhet të zhvillohen në përputhje me parimet e shtetit ligjor.

Çdo përpjekje për të nxjerrë nga shinat procesin demokratik, përmes veprimeve të dhunshme, përbën shkelje të ligjit, pengon përparimin e vendit dhe njollos reputacionin e tij ndërkombëtar. Jo vetëm autorët e dhunës, por edhe nxitësit e saj, duhet të mbajnë përgjegjësi ligjore. Ne bëjmë thirrje që autoritetet shtetërore të ndërmarrin të gjitha masat, sipas legjislacionit në fuqi, për të hetuar dhe ndjekur penalisht përgjegjësit e dhunës.

Gjithashtu, u bëjmë thirrje organizuesve të protestës së të premtes të sigurojnë një protestë paqësore. Në përputhje me mandatin e saj, Prezenca e OSBE-së mbetet e gatshme të mbështetë shtetin ligjor dhe demokracinë në Shqipëri.

Deklaratë e prezencës së OSBE në Shqipëri
Shkarkoni aplikacionin e A2