Pranohet gjykimi i shkurtuar për ish-ministrin Tahiri – A2

Pranohet gjykimi i shkurtuar për ish-ministrin Tahiri

Gjykata e Krimeve të Rënda ka pranuar gjykimin e shkurtuar për ish-ministrin e Brendshëm, Saimir Tahiri. Ky vendim nuk do të thotë pranim fajësie, por që gjykimi të zhvillohet pa iu nënshtruar shqyrtimit të fashikujve gjatë procesit në themel.

Pas debateve me prokurorët e çështjes në lidhje me afatet që përcakton kodi për paraqitjen e konkluzioneve përfundimtarë, Saimir Tahiri deklaroi se dy vite gjyq për të janë shumë. Në këtë seancë, Gjykata administroi dëshmitë e 4 të pandehurve të grupit Habilaj si provë e rëndësishme e akuzës.

“U bënë dy vite besoj se dhe shtyra e sotme është e tepërt. Me pretendimin se është para gushtit dhe gushti është pushim më duket akoma më e tepërt. Mendoj se ishin të gjitha kushtet që të bëhej një gjykimi pandërprerë siç e kërkon edhe Kodi edhe ligji, siç duhet të jetë normalisht për një çështje të tillë. Tani është shtyrë për në shtator kjo histori. Nuk u lodhët me 2 vite që e ndiqni këtë histori? Nuk dua të vë asnjë emër, thjesht dua të them se po zgjatet përtej çdo limiti të arsyeshëm. Jam plotësisht i gatshëm ta mbroj veten çdo ditë, çdo orë, çdo sekondë. Nuk e kuptoj sesi prokuroria që ka dy vite që merret me këtë çështje nuk është e gatshme ta bëjë këtë në minutën më të parë që i jepet arsyeja me parimin ose të dënojë një kriminel ose të lërë të lirë njëjtë pafajshëm. Kaq e thjeshtë. Më duket e tepërt. Tani nuk kam ca të bëj sepse vendimi u mor. Çfarë kisha për ta thënën e thashë edhe në seancë. U shty herën e parë për çështje poste, herën e dytë për çështje policësh, herën e tretë për çështje letrash dhe herën e katërt se gushti është pushim. I kam parë letrat dhe nuk kanë asnjë germë më shumë sesa letrat e para që kam parë unë që në shtator të 2018 kur kërkuan në Parlament heqjen e imunitetit tim. Nuk ka asnjë germë më shumë. Jam sjellë. Shyqyr që u gjeten dokumentet. Merre me mend se çfarë ndodh me njerëzit. Kur unë kam mundësinë të flas para jush e të them ndonjë gjë. Merre me mend se çfarë ndodh me njerëzit që ulërijnë dhe nuk dëgjohen”, u shpreh Tahiri.

Mësohet se më 10 shtator do të jepet edhe pretenca për Tahirin. Pas daljes nga gjykata, ai ishte i qetë, ndërsa tha se ishte Prokuroria dhe jo ai që e çoi për në shtator pretencën. “Në vjeshtë nuk shkova unë, por Prokuroria. Kjo histori në fillimet e shtetit ka nisur me burra me mustaqe dhe ka përfunduar me burra me botoks. Unë nuk jam ky model, por nuk do të zbardhem më shumë”.

Saimir Tahiri akuzohet për “korrupsion të zyrtarëve të lartë”, “trafik të lëndëve narkotike kryer në bashkëpunim” dhe “grup të strukturuar kriminal” në kuadër të dosjes ‘Habilaj’. Një muaj më parë, në ardhjen e radhës në gjykatë, Tahiri tha se është i lodhur nga zvarritja e këtij procesi gjyqësor dhe kërkoi gjykim të shkurtuar.

Shkarkoni aplikacionin e A2