Siguria ushqimore, Dritan Laçi: Ende problem matrikulimi i kafshëve

Profesori Dritan Laçi nga Fakulteti i Mjekësisë Veterinari ishte i ftuari i radhës në emisionin e gazetarit Endri Xhafo, “I ftuari” për të folur për sigurinë ushqimore. Profesor Laçi tregoi për disa nga problematikat kryesore me të cilat përballen konsumatorët për produktet të cilat konsumojnë dhe dha disa këshilla të vyera për t’u ushqyer në mënyrë sa më të sigurt.

Sipas Dritan Laçi problemi kryesor në tregun shqiptar është mos zbatimit i gjurmueshmërisë së kafshëve që theren. Ai tha se fermerët e kanë detyrim matrikulimin e kafshëve, por shpesh herë janë trembur për të mos paguar taksën.

“Të gjitha kafshët janë të detyruar fermerët t’i matrikulojnë, është një kod që identifikon kafshën dhe shoqërohet me një certifikatë për bërjen e vaksinimeve.

Procesi i matrikullimit ka një kosto të caktuar dhe politika ka luajtur me këtë kosto, ku herë e ka mbuluar vetë pjesërisht dhe herë ja ka faturuar fermerit. Fermerët kanë qenë të trembur për të mos paguar një taksë të supozuar për krerët që matrikuloheshin. Fermerët marrin numrin e matrikujve vetëm 5 minuta para se kafshët të theren. Kjo ndodh rëndomtë.”

Më tej, profesori i Fakultetit të Mjekësisë Veterinare tha se kontrolle duhet të ketë dhe për ushqimin e kafshëve për çështjen e aflatoksinës. Sipas tij, Shqipëria importon rreth 90% të ushqimeve për blegtorinë.

“Aflatoksina është një toksinë e shkaktuar nga një myk që ndodhet në farërat që përdoren për ushqimin e kafshëve. Ne pothuajse importojmë në masën 90% ushqimet për blegtorinë madje dhe këto ushqime që vijnë në Shqipëri duhet të jenë të certifikuara për mungesën e kësaj aflatoksine”

Një tjetër shqetësim që ngriti Dritan Laçi ishte dhe mungesa e gjurmueshmërisë dhe për barnat që përdoren nga kafshët. Për profesorin nëse antibiotikët përdoren në mënyrë të pakontrolluar tek kafshët, mund të japin problem dhe për shëndetin publik.

“Antibiotikët që përdoren me doza jo të kontrolluara tek kafshët, absolutisht që krijon antibiotiko-rezistencë në shëndetin publik. Nëse marr doza antibiotikësh përditë duke u ushqyer, kur kam nevojë të bëj një trajtim shëndetësor, antibiotiku nuk bën efekt. Nëse, për shembull, pas disa vitesh do të duhet të marrim antibiotik të gjeneratës së 4-ët ne ato i kemi marrë përmes ushqimeve dhe nuk do të bëjnë efekt”.

Për konsumatorin, profesori Laçi dha disa këshilla duke thënë se në tregun shqiptar sot ekzistojnë dy lloj produktesh mishi, vendi dhe të huaj. Sipas tij produktet e importit mbahen në temperatura ngrirje dhe cilësia dhe çmimi i tyre është më i ulët.

Në fund, Dritan Laçi kërkoi nga autoritetet përkatëse të bëjnë një rifreskim të rregulloreve dhe ligjeve për shërbimin e veterinarisë, pasi siguria ushqimore është një element shumë i rëndësishëm.

Shkarkoni aplikacionin e A2