Lionnel Messi, Cristiano Ronaldo dhe Virgil van Dijk janë tre finalistët për çmimin e UEFA-s, “Lojtari i Vitit”, i cili do të jepet për edicionin 2018-2019.
Fituesi do të bëhet publik në mbrëmjen e 29 gushtit në Montecarlo, gjatë ceremonisë për shortin e fazës së grupeve të Champions League. Van Dijk cilësohet si favorit, edhe sepse ishte një prej pikave më të forta të Liverpool, në fitimin e Champions.
Mbrojtësi holandez u vlerësua edhe si lojtari më i mirë i finales, ndërsa së fundmi triumfoi edhe në finalen e Superkupës së Europës.
Ai sfidon dy yjet e dekadës së fundit, Lionnel Messin, i cili u shpall golashënuesi më i mirë i Champions League gjatë edicionit të kaluar dhe fitoi Këpucën e Artë në La Liga spanjolle, por edhe Cristiano Ronaldo, që triumfoi në Ligën e Kombeve me Portugalinë dhe fitoi titullin dhe Superkupën e Italisë me Juventus.