Drejtorët e Prefekturës së Shkodrës i binden urdhrit të kryeministrit Edi Rama.
Një ditë pasi Rama u kërkoi dorëheqjet, thuajse të gjithë drejtorët e drejtorive zbatuan urdhrin. Kështu, kanë lënë detyrën drejtori i Hetimit Tatimor të veriut, Agim Shimaj, i emëruar më pak se dy muaj më parë nga ministrja Anila Denaj; drejtori i Drejtorisë Arsimore Kadri Ymeri; drejtori i Bujqësisë, Mustaf Kraja; drejtori i Hidrocentralit të Vaut të Dejës, Luan Heta; drejtori i Postës Shkodër, Edmond Emini, i cili është njëkohësisht edhe kryetari i Degës Shkodër.
Kanë dhënë gjithashtu dorëheqjet drejtori i Administrates së Zonave të Mbrojtura, Agim Dardha dhe drejtori i Shëndetit Publik, Astrit Beci.
Ndërkohë, për drejtorin e Spitalit të Shkodrës, Ardian Dajti, nuk është konfirmuar ende dorëheqja, edhe pse burimet thonë që edhe ai e firmosi ikjen në zbatim të urdhrit të kryeministrit.
Ndaj këtyre dorëheqjeve reagoi dega e PD-së në Shkodër, që e cilësoi të paligjshëm urdhrin e kryeministrit dhe nisjen e instalimit të partisë-shtet. Demokratët akuzuan Ramën se po vendos PS-në e Shkodrës në duart e Tom Doshit, por fillimisht po i spastron atij fushën që më pas të përcaktojë drejtorët e rinj rajonalë.