Verë pa libra… Fëmijët, dikur miq me leximin, sot të varur nga telefoni

Pushimeve u erdhi fundi. E nëse të rriturit bëjnë bilancin e shpenzimeve, fëmijët kanë të tjera llogari. Në ditët e mbetura, para fillimit të shkollës, një pjesë e tyre tregojnë për vendet që vizituan, plazhet dhe argëtimin në ditët e nxehta.

Por, kur i pyet për marrëdhënien me librin dhe sa kanë lexuar këtë verë, thonë se ishin më argëtues celulari dhe iPad. Disa nuk kanë lexuar një libër që prej një viti, ose nuk e mbajnë mend fare librin e fundit që kanë lexuar. Madje edhe kur duan përralla apo tregime, një pjesë e fëmijëve zgjedhin t’i dëgjojnë nga telefoni.

Në librari stendat për fëmijët janë më tërheqëset. Kjo nuk ishte vera më e mirë për shitjen e librave për fëmijë, por nuk ka munguar interesi veçanërisht për klasiket. Jashtë kamerës, një pjesë e prindërve shprehen të lumtur që fëmijët këtë verë arritën të lexonin disa libra edhe pse me detyrim. Ndërsa të tjerë, qe jetën e kanë ndërtuar jashtë Shqipërisë, tregojnë se leximi që në moshë të hershme është politikë e vendit ku jetojnë.

Nëse duam që fëmijët të jenë miq të librave dhe jo të varur nga teknologjia, edukimi duhet të nisë nga prindërit, të forcohet nga shkollat dhe të stimulohet me nisma e politika të veçanta.

Shkarkoni aplikacionin e A2