Përkujtohet në Poloni nisja e Luftës së Dytë Botërore – A2

Përkujtohet në Poloni nisja e Luftës së Dytë Botërore

poloni 1100x620

Presidenti polak Andrej Duda dhe homologu i tij gjerman, Frank Valter Steinmeier përkujtuan viktimat e para të Luftës së Dytë Botërore në Vielun, në Poloni. Qyteti jugor polak ishte i pari që u bombardua nga forcat e ushtrisë gjermane, duke shënuar kështu edhe nisjen e luftës 1 shtatorin e vitit 1939.

“Bota vuajti kasaphanën më të egër që na mësoi se sa vlen humbja e dhjetra milionë jetëve në mbarë botën, sa vlen humbja e jetëve të njerëzve të zakonshëm, civilëve, atyre që nuk u përfshinë në luftime, të paarmatosurve. Kjo përbën kasaphanën më të madhe në histori”, tha Duda. 

Prezenca e Presidentit gjerman Steinmeier shihet nga polakët si një domethënie e madhe dhe një hap që duhej ndërmarrë më herët përsa i takon marrëdhënieve dypalëshe mes popujve. 

“Qëndroj sot para jush, para atyre që i mbijetuan atyre kohërave, pasardhësve të viktimave, rezidentëve të vjetër e të rinj të Vielunit, i përulur dhe mirënjohës. Dua t’i përulem të gjitha viktimave të asaj kohe, viktima të tiranisë gjermane dhe kërkoj falje për sa ndodhi”, u shpreh Steinmeier. 

Paralelisht me Vielunin, ceremoni përkujtimore u mbajtën edhe në Gdansk, qyteti që përballoi sulmet kryesore të asaj kohe. Të prira nga kryeministri i vendit, Mateus Morviecki, dhe kreu i Komisionit Europian, Frans Timmermans, ceremonitë përkujtimore njohën prezencën edhe të një sërë emrave të tjerë si kancelarja gjermane Angela Merkel dhe z/presidenti amerikan, Mike Pence.

Moraviecki foli për dëmet e mëdha materiale, shpirtërore, ekonomike dhe financiare që iu shkaktuan Polonisë nga lufta kur i parashtroi të pranishmëve kërkesën për kompensimin e dëmeve: “Duhet të flasim për këto humbje, duhet t’i kujtojmë dhe të kërkojmë të vërtetën, por edhe kompensimin e dëmeve”.

Kjo nuk është hera e parë që Gjermanisë i kërkohet të paguajë dëmet e luftës, por, sipas Berlinit zyrtar, të gjitha kompensimet e mundshme i janë bërë çdo shteti që i pretendon ato.