Fëmijë të pavaksinuar, gjobë 200 mijë lekë – A2

Fëmijë të pavaksinuar, gjobë 200 mijë lekë

KONTROLL FEMIJEVE TE PAVAKSINUAR frame 2733 1100x620
Video

Ministria e Shëndetësisë nis kontrollet në kopshte e çerdhe për të verifikuar fëmijët e pavaksinuar.  Dy javë para fillimit të shkollës dhe në periudhën e regjistrimeve, ministrja Ogerta Manastirliu urdhëroi monitorim të rreptë të kartelave të vaksinave të fëmijëve, në çdo institucion publik dhe  veçanërisht privat.

200 mijë lekë të reja është gjoba për institucionin, nëse  fëmijët regjistrohen të pavaksinuar. Masa e Ministrisë së Shëndetësisë bëhet në prag të fillimit të shkollës dhe pas epidemisë e viktimave që ka shkaktuar fruthi vitet e fundit. Edhe për Organizatën Botërore të Shëndetësisë, Shqipëria tashmë është një nga vendet ku është rikthyer fruthi. Përfaqësuesi i zyrës së OBSH-së në Tiranë bëri apel për vaksnimin e fëmijëve.

Shqipëria ka një mbulesë të mirë me vaksina, por si e gjithë Europa, edhe këtu po përballemi me steriotipe të gabuara lidhur me vaksinimin si pasojë e lajmeve të rreme që qarkullojnë për vaksinat. Por në fakt vaksinimi është i sigurt, i domosdoshëm dhe shpëton jetë. Vitet e fundit është ulur mbulesa vaksinale dhe veçanërisht në Tiranë. Një pjesë e prindërve refuzojnë t’u kryejnë fëmijëve  vaskinën e fruthit, pasi e cilësojnë shkaktare të autizmit, por ka edhe nga ato familje që kundërshtojnë kryerjen e të gjitha vaksinave. Ndërkohë, duke filluar nga 1 tetori, në kalendar do të shtohet edhe vaksina e Rotavirusit.