Dobësohet uragani “Dorian”, i drejtohet Kanadasë si një ciklon post-tropikal – A2

Dobësohet uragani “Dorian”, i drejtohet Kanadasë si një ciklon post-tropikal

dorian 1 1100x620

Nga një uragan i kategorisë së pestë, që shkatërroi ishujt Bahamas për 10 ditë rresht me shira të rrëmbyer dhe erëra deri në 320 km/h, “Dorian” iu drejtua Kanadasë si një ciklon post-tropikal.

Edhe pse banorët e Nova Skotias i kishin marrë masat pas paralajmërimeve se “Dorian” do t’i godiste pasi u zhvendos nga SHBA-të, sërish “Dorian” shkuli pemët në rrugë, ndërsa 450 mijë banesa kanë mbetur prej orësh pa energji elektrike.

Ministri i Mbrojtjes Publike, Ralph Goodale tha se ushtria do të dislokohet në mbarë vendin për të ndihmuar qytetarët në vështirësi.

Ndërkohë, numri i viktimave që uragani “Dorian” shkaktoi në Bahamas është rritur në 43, por pritet që bilanci të jetë edhe më tragjik për shkak të numrit të lartë të të zhdukurve. 90% e shtëpive, ndërtesave por edhe infrastrukurës së Bahamasit është shkatërruar totalisht brenda dy ditëve dhe për rindërtimin e ishujve Bahamas dhe Abaco do të nevojiten miliarda dollarë.

Mijëra vetë janë strehuar në qendrat e ngritura për rastet e emergjencës dhe shumë pak institucione kanë akses në ujë e energji elektrike, duke vënë në vështirësi edhe qendrat shëndetësore për të realizuar ndërhyrjet e nevojshme.

Ndihma për banorët e mbetur tashmë pa një strehë ka arritur në 2,8 milionë dollarë, mjaftueshëm vetëm për ushqime për 44 mijë banorët e ishullit të shkatërruar.