Irani akuzon SHBA: Takimi mes Trump dhe Ruhanit nuk do të ndodhë

Sulmet ndaj rafinerive saudite të naftës përshkallëzojnë më tej tensionet mes SHBA dhe Iranit. Ministria e Jashtme e Teheranit mohoi kategorikisht autorësinë dhe konfirmoi se presidenti Hasan Ruhani nuk do ta takonte kreun e Shtëpisë së Bardhë në asamblenë e përgjithshme të OKB-së, gjatë këtij muaji.

“Në i refuzojmë këto lloj deklaratash. Republika Islamike e Iranit ka mbështetur haptazi popullin e Jemenit dhe të drejtat e tij. Por duke na akuzuar për këto sulme, Shtetet e Bashkuara i qëndrojnë besnik politikës false të cilën e kanë përqafuar pas dështimeve të tyre. Takimi mes dy presidentëve nuk është në agjendën e Republikës Islamike të Iranit dhe nuk do të ndodhë”, thuhet në deklaratën e ministrisë iraniane. 

Gjithsesi, diplomacia iraniane shton se “kemi deklaruar më parë se nëse Shtetet e Bashkuara heqin dorë nga terrorizmi ekonomik dhe presionet, dhe nëse i kthehen ujdisë bërthamore do të jenë të ftuar në një samit ku marrin pjesë të gjitha vendet që kanë firmosur marrëveshjen nukleare”.

Shkarkoni aplikacionin e A2