Ditën e parë të shkollës, kryeministri Edi Rama dhe kryebashkiaku Erjon Veliaj e nisën nga shkolla e rikonstruktuar “Servete Maçi” në kryeqytet.
Kryeministri foli për 200 shkolla ku qeveria ka vënë dorë, ndërsa rritjen e cilësisë së mësimdhënies e lidhi me shmangien e punësimeve të militantëve partiakë.
“Janë afro 200 shkolla në të gjithë vendin që janë rindërtuar dhe mbi të gjitha sot kemi një trupë mësimore të mbrojtur nga sulmet e jashtme të politikës, nga “kthetrat” e interesave politike apo edhe nga imponimet e deridjeshme të korrupsionit dhe ryshfetit. Sigurisht, ka ende elementë që duhen adresuar dhe siç jemi zotuar, në vitin 2021 do të kemi libra falas për të gjithë, nga klasa e parë në të nëntën”, tha Rama.