Negociatat, CDU/CSU: Nëntë kushte për Shqipërinë – A2

Negociatat, CDU/CSU: Nëntë kushte për Shqipërinë

dwokkk 1100x620
Video

Më 26 shtator, Parlamenti gjerman do të votojë për negociatat për Shqipërinë dhe Maqedoninë e Veriut. “Deutsche Welle” ka zbuluar se Bundestagu gjerman pritet të vendosen kushte për Shqipërinë, ndërsa Maqedonia e Veriut mund t’i fillojë negociatat qysh në janar.

Dokumenti që do të formulojë qëndrimin gjerman në Këshillin e BE-së është duke u finalizuar. Ai do të hidhet në votim me kërkesë të dy grupeve parlamentare të mazhorancës qeveritare, Unioni Kristdemokrat dhe Unioni Kristsocial (CDU/CSIU) si edhe Partia Socialdemokrate.

Aty është parashikuar që Maqedonia e Veriut të fillojë bisedimet qysh në janar, ndërsa Shqipëria do t’i nisë ato vetëm kur të plotësohen disa kushte.

Sipas burimeve të DË në qarqet e grupit parlamentar CDU/CSU, bëhet fjalë pak a shumë për nëntë pika:

– funksionimi i Gjykatës së Lartë dhe Gjykatës Kushtetuese

– miratimi i reformës zgjedhore;

– implementimi i reformës zgjedhore;

– ndjekja penale e gjykatësve dhe e prokurorëve që nuk e kanë kaluar provimin e Vettingut;

– ndjekja penale e akuzave për shitblerjen e votave;

– vënia në punë e prokurorisë speciale për luftimin e korrupsionit, SPAK,

– rezultate në luftimin e korrupsionit dhe krimit të organizuar, përfshirë edhe kapja dhe ndjekja penale e personave kyç të krimit, të të ashtuquajturve “peshq të mëdhenj”;

– përparime në reformën e administratës publike;

– sqarimi përfundimtar me vendim të Gjykatës Kushtetuese i ligjshmërisë së zgjedhjeve lokale të 30 qershorit 2019.