Familja Çaushi në Qafëzezë, në çadër dhe me kushte të vështira ekonomike – A2

Familja Çaushi në Qafëzezë, në çadër dhe me kushte të vështira ekonomike

KR historia Qafzeze frame 1153 1100x620
Video

Familja Çaushi në fshatin Qafëzezë është një nga dhjetëra familjet të cilave iu dëmtuan banesat nga tërmeti i rënë 1 qershorin e këtij viti.

Prej katër muajsh, pesë anëtarët e kësaj familje i kalojnë netët në çadrën që e kanë montuar në oborrin e banesës së dëmtuar, ndërsa ende nuk ka asnjë veprim konkret për riparimin e banesës.

Jetesa nën çadër, përveç të tjerave, ka një tjetër rrezik, pasi ajo është montuar buzë një përroi, i cili në kohë reshjesh sjell prurje të mëdha duke rrezikuar përmbytjen e çadrës.

Por banesa e dëmtuar dhe jetesa nën çadër është vetëm një pjesë e problemeve. Pamundësia ekonomike e kësaj familje është në kushtet e të papërballueshmes, pasi kanë edhe një vajzë me probleme mendore e kategorisë së dytë dhe kempi për vajzën është e vetmja e ardhur që vjen nga shteti, përveç atyre pak të ardhurave që vijnë nga produktet bujqësore.

Edhe pse kryefamiljari tregon vështirësitë dhe shpreson në një të ardhme më të mirë, bashkëshortja i kërkon ndihmë shtetit të paktën për vajzën e sëmurë.

E ndërsa kjo familje apelon për ndihmë, dimri po afrohet dhe në këto anë jetesa nën çadër në dimër është e papërballueshme.