Më shumë se 300 lëkundje, sizmologu Koçi: Rreziku kryesor ka kaluar – A2

Më shumë se 300 lëkundje, sizmologu Koçi: Rreziku kryesor ka kaluar

TERMETI SIZMIOLOGU frame 521 1100x620
Video

Pa kaluar 24 orë nga tërmeti i pazakontë i së shtunës në vend janë regjistruar më shumë se 300 lëkundje të tjera.

Në varësi të fuqisë, vetëm 30 kanë qenë të ndjeshme për njerëzit, të tjerat veç për aparaturat e Institutit të Gjeoshkencës.

“Janë regjistruar mbi 320 ngjarje deri në momentin që ne po flasim, nga të cilat 2 ngjarje kanë qenë me magnitudë më shumë se 5, 3 ngjarje kanë qenë nga 4.2 deri në 5 dhe nga 3 deri në 4.2 janë rreth 18 ngjarje”, shprehet Rexhep Koçi.

Eksperti thekson se aktiviteti sizmik është i pa parashikueshëm, por që goditje të forta shoqërohen me të tjera të mëvonshme.

“Nuk ka ndonjë metodë për të përcaktuar sesa zgjat, por ajo që ne dimë është se sa më e fuqishme të jetë ngjarja kryesore aq më e gjatë është edhe periudha”.

Duke iu referuar tendencës së lëkundjeve, Koçi vlerëson se nuk ka më vend për panik. “Ne mendojmë se rreziku kryesor ka kaluar”, shprehet sizmologu.

Për qytetarët, banesat e të cilëve janë dëmtuar nga tërmeti, por edhe për instancat që menaxhojnë emergjencën sizmologu këshillon: “Banesat e dëmtuara nuk duhet të vizitohen nga njerëzit”.