Gjakoset derbi, tifozët e Tiranës dhe Partizanit përleshen para ndeshjes

Pak minuta nga nisja e derbit Tirana – Partizani, u shënua incidenti i parë mes dy tifozerive.

Tifozët e të dy skuadrave janë përleshur, pasi kanë arritur çajnë rrethimin e rojeve të sigurisë në “Selman Stërmasi” dhe kanë zbritur në fushë. Me stadiumin e mbushur plot, ka qenë e vështirë për rojet e sigurisë që të ndalojnë përshkallëzimin e dhunës, ku dhjetëra tifozë të Tiranës janë parë të vrapojnë drejt sektorit të tifozëve të Partizanit.

Në fushë janë futur edhe disa forca policie ndërsa në një video të siguruar nga A2, shihen tifozët e Tiranës që largohen për t’u rikthyer në vendet e tyre, kurse ata të Partizanit shkulin disa ndenjëse dhe i hedhin në drejtim në fushës.

Pas incidentit, janë shtuar forcat e policisë brenda stadiumit, për të parandaluar veprime të tjera të dhunshme nga të dy palët. Tifozët e të dy skuadrave janë përleshur shpesh me njëri-tjetrin edhe në rrugët e qytetit, ndërsa nuk humbasin ndeshje për të “goditur” kundërshtarët me pankarta ironike.

Me fillimin e ndeshjes sherri ia ka lënë vendin fishekzjarrëve, koreve ofenduese dhe pankartave. Ndërkohë, në tribunën kryesore, nuk kanë munguar edhe tifozët VIP, si Zëvendëskryeministri Erion Braçe, tifoz i flakë i Partizanit, Guvernatori i Bankës Gent Sejko, por edhe Presidenti i FSHF, Armand Duka dhe sportisti Florian Marku.

Shkarkoni aplikacionin e A2