Partia Demokratike akuzoi qeverinë se ka dështuar me mbledhjen e të ardhurave nga Doganat e Tatimet dhe për këtë arsye po përgatit një Akt Normativ që shkurton investimet dhe dëmshpërblimet për ish-të përndjekurit.
Sipas demokratëve, viktimë do të jenë edhe shpërblimet e fundvitit për pensionistët.
Dorian Teliti tha: “Qeveria do të miratojë së shpejti në Parlament aktin normativ që vulos dështimin e Edi Ramës me ekonominë edhe këtë vit. Me gjithë përpjekjet tinzare për të fshehur dështimin, të gjithë treguesit flasin për përkeqësimin e mëtejshëm të ekonomisë së vendit, për më pak punë, për më pak para në xhepat e shqiptarëve. Akti normativ qeveritar fsheh të vërtetën mbi dështimin e mbledhjes së të ardhurave; nuk parashikon shpërblime për pensionistët dhe të pamundurit; ul ndjeshëm investimet në projekte zhvillimore dhe infrastructure; braktis qëllimisht ish të përndjekurit”.
“Ecuria negative e mbledhjes së të ardhurave, ku vetëm nga tatimet dhe doganat në 8 muajt e parë, mungonin mbi 60 milion dollarë, do të vazhdojë të thellohet akoma edhe më shumë gjatë muajve të fundit të vitit. Edi Rama ka në tryezën e tij të punës një dokument konfidencial, ku parashikohet që, me ritmet aktuale, të ardhurat nga tatimet e doganat do të jenë 90 - 100 milionë dollarë më pak”, shtoi Teliti.