Shengeni Ballkanik, Kurti: Më shumë ide sesa projekt

Albin Kurti, kryetar i Lëvizjes Vetëvendosje, deklaroi se Shengeni Ballkanik është tani për tani vetëm ide.

Kur u pyet nga A2 nëse Kosova do t’i bashkohej Shengenit Ballkanik, Kurti u përgjigj: “Unë pres që ta shikoj një tekst se çfarë nënkupton saktësisht. Më ngjan më shumë me ide sesa me projekt. Tani për tani është vetëm ide”.

Në lidhje me marrëdhënien e tij me kryeministrin shqiptar Edi Rama, Kurti tha: “Jemi persona të ndryshëm, politikanë të ndryshëm, por duam të bashkëpunojmë në mënyrë që dallimet që kemi të mos rrezikojnë bashkëpunimin tonë, sepse fundja nuk jemi dy persona të veçantë, por dy funksione për të cilët shqiptarët presin bashkëpunim”.

Sa i përket bisedimeve Kosovë-Serbi, Kurti u shpreh se nuk ka një periudhë konkrete për nisjen e tyre, pasi, sipas tij, “duhet përgatitur mirë dialogu”.

“Pres të takohem me pasardhësin e Mogherinit për të përcaktuar parimet se si të ecim para. Për marrëveshjen me Serbinë duhet të ndryshojë shumë më tepër Serbia sesa Kosova”, theksoi Kurti, i cili shtoi se “tarifa 100% për mallrat serbe do të zëvendësohet me reciprocitet të plotë politik, ekonomik dhe tregtar me Serbinë”.

Shkarkoni aplikacionin e A2