U mendua se debati do të ishte për 21 Janarin, atë të Kongresit të Lushnjës dhe jo të 2011-ës. Por diskutimi i Komisionit të Ligjeve mori trajtat e një dileme nëse shqiptarët pushojnë më shumë se ç’duhet.
“Ligji është i vitit 1992 dhe ka nevojë të përmirësohet, pasi jo çdo festë zyrtare mund të shoqërohet me ditë pushimi”, u shpreh Ulsi Manja.
Janë 14 festat zyrtare në Republikën e Shqipërisë. Nëse përkojnë me të shtunën apo të dielën, pushimi për ata që punojnë në shtet, mbartet gjatë javës.
Deputetët e opozitës parlamentare synojnë të shtojnë dhe një tjetër, 21 janarin 1920, kur u mbajt Kongresi i Lushnjës dhe ndër të tjera u vendos Tirana kryeqytet.
Nisma që gjeti dhe dakordësinë e disa prej socialistëve u kundërshtua nga të tjerët për shkak të kostos financiare.
Çështja do të kalojë në duart e instituteve që merren me historinë apo dhe grupeve të punës në qeveri.
“Të ngremë një grup pune dhe të shohim datat e festave”, tha Manja.
Mbi rëndësinë e Kongresit të Lushnjës u gjet dakordësia, por jo mbi pushimet e deputetëve. Java e gjelbër konsolidon deputetët mes kategorive të atyre që pushojnë më shumë. Mbi 1muaj në verë dhe 1 tjetër në dimër.