Policia ka arrestuar një person mëngjesin e sotëm, i dyshuar si një nga autorët e plagosjes së trefishtë në Durrës, ku një prej të plagosurve ishte dhe prokurori Arjan Ndoja. I arrestuari është Redjan Rraja, 34 vjeç. Rraja është i njohur si një nga personat e proceduar penalisht për vrasjen e Elton Çiços në ish-Bllok. Ai është gjithashtu i afërm i deputetit socialist Rahman Rraja. Rraja është marrë në pyetje nga prokurorët në Drejtorinë e Policisë së Tiranës, ndërsa prokurorët dyshojnë se ka edhe bashkëpunëtorë të tjerë.
Arrestimi është kryer në orët e para të mëngjesit të së martës në Fushë Krujë. Ndërkohë, janë duke u bërë ende verifikime dhe hetime për bashkëpunëtorët në ngjarje.
“Për dokumentimin ligjor të këtij procedimi penal në lidhje me autorët e mundshëm të kryerjes së kësaj ngjarje të rëndë kriminale, me qëllim zbulimin dhe sekuestrimin e provave materiale që lidhen me autorët e kryerjes së kësaj ngjarjeje, iu kërkua Gjykatës së Shkallës së Parë për Krime të Rënda lejimi i kontrollit të banesave të 11 shtetasve me banim në Krujë dhe të katër shtetasve me banim në Tiranë dhe në Lushnjë. Si rezultat i këtyre kontrolleve u gjetën dhe u sekuestruan prova materiale që dyshohet se kanë lidhje me autorët e mundshëm të kësaj ngjarjeje. Provat e sekuestruara po i nënshtrohen një analize të hollësishme nga grupi hetimor dhe një pjesë e tyre u dërguan në Laboratorin Shkencor për ekzaminim të mëtejshëm”
Njoftimi i Policisë
Prokurori i Durrësit, Arjan Ndoja dhe miku i tij Landi Muharremi kanë qenë objektivi i atentatit në Shkozet të Durrësit pasditen e së premtes. Prokuroria e Krimeve të Rënda, e cila po heton mbi motivet dhe autorët e atentatit ka ngritur pistat e para. Ka dyshime se atentati të ketë qenë i porositur dhe pistat kanë lidhje me ngjarje kriminale dhe ato që lidhen me dosjet e pronave.
Prokurorët thanë se kanë marrë në cilësinë e provës materiale të gjitha dosjet e fundit që prokurori Ndoja ka marrë në shqyrtim. Dëshmia e tij është siguruar pak minuta pas ngjarjes, por prokurorët thanë se do ta ri-pyesin.
Provat shkencore tradhtuan Rrahjën, pasi gjatë ekspertizës shkencore, ushtruar në dy armë zjarri Kallashnikov dhe dy maska të gjetura në një makinë të braktisur, u gjetën prova që çuan në arrestimin e tij.
Nga ana tjetër, burime të gazetares së A2, Anduena Llabani, prokurorët paralajmërojnë edhe arrestimet të tjera, pasi mendohet se Rrahja ka pasur bashkëpunëtorë të tjerë. (A2 Televizion)
A2 CNN Livestream
MUND TE LEXONI GJITHASHTU
