Në shtëpinë e vogëlushit të cilin A2 e gjeti në kampin e ISIS – A2

Në shtëpinë e vogëlushit të cilin A2 e gjeti në kampin e ISIS

Osama Fidani është 10-vjeçari shqiptar që ndodhet në kampin famëkeq të Al Hawlit në Siri. Ai është shqiptar nga Gostivari. 6 vjet më parë u largua me të atin në Siri, por Osama nuk është i vetmi nga familja e tij në kamp. Ai ndodhet me dy vëllezërit Fidan Fidani 14 vjeç, Advanin 8 vjeç dhe motrën që ka lindur në Siri, Rejani 4 vjeç.

Ndërsa, një ditë më parë, nëna e tyre nga kampi kërkoi ndihmë për t’u kthyer.

“Me na marrë dikush se kushtet i shikoni vetë në televizor. Sepse nuk rrihet këtu sepse është ftohtë” tha nëna e 10-vjeçarit për gazetarin e A2, Julian Kasapi.

Kryefamiljari Bekim Fidani ka humbur çdo kontakt me familjen në kamp dhe të afërmit në Gostivar.

Shtëpia e Bekim Fidanit ndodhet në qendër të Gostivarit, ku prej 6 vitesh është e mbyllur. Vëllai i Bekimit na çon në shtëpinë e tij. Nuk ka më zëra fëmijësh, por trishtim e boshllëk të madh. Intervista e Osamës nga kampi i ka tronditur jo pak.

“E njoha. Kishte ndryshuar, ishte rritur, Kur ikën nga këtu ishin të vegjël. Ishte rritur ishte bërë i madh. Nga tiparet ka ndryshuar shumë pak. Është ashtu si e mbaj mend unë. U ndjemë shumë mirë, faktin që gazetarët tuaj kishin marrë guximin për të hyrë në atë kamp. Nga ana tjetër, pasi pamë regjistrime u prekëm në aspektin e kushteve se si jetojnë ata në kamp. Vij gati çdo ditë dhe vizitoj shtëpinë e tyre. Kam shumë mall për ta sa nuk përshkruhet. Mbesa quhet Rejani dhe ka lindur atje”, tha xhaxhai i fëmijëve Habib Fidani.

Xhaxhai dhe vëllai i Bekimit i lutet për kthimin e fëmijëve pranë shtëpisë. Por një mesazh e ka edhe për të vëllain që mendojnë se mbahet në burg nga kurdët. “Kthehu vëlla se ka kush të pret”, e mbylli rrëfimin e tij Habib Fidani.

Shkarkoni aplikacionin e A2