Albin Kurti Ika idetë e qarta. Në pritje të takimit me kryetarin e Lidhjes Demokratike të Kosovës, Isa Mustafa, që mbahet të premten, ai thotë se nuk ka mbetur shumë për të diskutuar lidhur me formimin e qeverisë së ardhshme.
“Kryeministrin e ka përcaktuar populli i Kosovës më 6 tetor, ministritë janë të diskutueshme. Ne këmbëngulim në harmonizimin tonë programor. Duhet të gjendet edhe një formulë për ndarjen e këtyre përgjegjësive, por unë nuk mund të flas tani se këtë e lëshoj e këtë nuk e lëshoj”, tha Kurti.
Ai shtoi më tej se në diskutimin e Mustafën do të ketë vend edhe negociatat lidhur me postin e kreut të shtetit. “Ne do të diskutojmë me Mustafën për postin e Presidentit, por fokusi ynë janë karriget e zbrazëta dhe ato karrige të zbrazëta janë të Kryeministrit dhe Kryetari të Kuvendit dhe unë besoj se kjo është detyrë më urgjente që kemi”.
Edhe njëherë, kreu i Lëvizjes Vetëvendosje përjashtoi mundësinë e një koalicioni me Listën Serbe, pasi në zonat e banuara me shumicë serbe në Kosovë është hasur presion i madh ndaj qytetarëve dhe manipulime me votat gjatë zgjedhjeve të 6 tetorit. Megjithatë konfirmoi detyrimin kushtetues që një ministër do t’i përkasë këtij komuniteti.