Jo vetëm Shqipëria, por e gjithë bota ndoqi me ankth të martën, situatën dramatike pas tërmetit të fuqishëm që goditi vendin në orët e para të së martës. CNN përcolli live pamje të godinave të shndërruara në rrënoja dhe operacionet e kërkim - shpëtimit në Durrës dhe Thumanë. Gazetari i A2 Blendi Salaj, përcolli për gjigandin mediatik momentet e tmerrit, duke e informuar orë pas ore mbi zhvillimet e fundit.
Edhe mediat e tjera ndërkombëtare, nga BBC tek New York Times, i dedikuan hapësirën kryesore tragjedisë në Shqipëri duke përcjellë hap pas hapi imazhe e informacione mbi tragjedinë që pllakosi Shqipërinë.
Me frymën pezull qëndroi edhe Italia fqinje, që gjithashtu transmetoi live imazhet tragjike që vinin nga Durrësi e Thumana.
Videot që tregonin garën dramatike me kohën për gjetjen e të mbijetuarve, mallëngjimin për jetët e shpëtuar dhe momentet rrëqethëse të nxjerrjes së trupave pushtuan televizione e media online, nga Canale 5, tek Corriere della Sera, TGcom apo la Repubblica, e cila transmetoi për orë të tëra pamjet e A2.