Në minuta kritike për jetën, Marlind Shkodra, 30-vjeçari i mbetur i plagosur nga tërmeti në Durrës, është dërguar në orët e pasdites së të mërkurës drejt Spitalit të Barit.
Ai u mbajt për disa orë në reanimacionin e Spitalit Ushtarak, por ndërhyrjet e mjekëve shqiptarë e bënë të pamundur përmirësimin e gjëndjes së tij shëndetësore.
Plagët e marra në kokë e kanë vënë në pikëpyetje jetën e tij.
Familjarët thonë se Marlindi jetonte në katin e gjashtë të pallatit 6-katësh i cili u shemb pas tërmetit në Durrës. Por, ky ishte ai që i dha goditjen fatale shtesës së pallatit ku jetonte familja Shkodra.
“Ishte bërë shtesë e re, pa standard”, thotë xhaxhai.
Mjekët italianë, të mbërritur pak orë pas tërmetit, vendosën dërgimin e tij në Itali për shkak të një ndërhyrjeje më të specializuar.
Të dhënat zyrtare të Ministrisë së Shëndetësisë flasin për 750 persona të lënduar nga tërmeti i 26 nëntorit, nga të cilët 660 janë të shtruar në spitalet e traumës në Tiranë dhe Durrës. Nga këta, 65 janë në gjendje të stabilizuar, ndërsa 3 në gjendje të rëndë shëndetësore.