Rrëzimi i pallateve në Thumanë, Bardhi i shtron 5 pyetje kryeministrit – A2

Rrëzimi i pallateve në Thumanë, Bardhi i shtron 5 pyetje kryeministrit

Sekretari i Përgjithshëm i Partisë Demokratike, Gazment Bardhi, i drejtoi 5 pyetje kryeministrit Edi Rama në lidhje me pallatet që u shembën gjatë tërmetit të 26 nëntorit.

“Pallatet në Thumanë, ku humbën jetën 24 qytetarë, u dëmtuan rëndë që në 21 Shtator. Banorët tregojnë se për gati 1 muaj kanë jetuar në çadra, për shkak se banesat e tyre dukeshin të pasigurta. Është fakt se Qeveria nuk mori asnjë masë konkrete pas tërmetit të 21 Shtatorit për t’u ardhur në ndihmë njerëzve me banesa të dëmtuara, ku 24 banorë humbën jetën më 26 Nëntor”, shkruan Bardhi në rrjetet sociale.

“Sot, është dita të zbardhen dhe te sqarohen një herë e mirë para gjithë shqiptarëve këto 5 pikepyetje: A u verifikuan pallatet në Thumanë pas tërmetit të 21 Shtatorit?
Kush janë ekspertët që u angazhuan dhe çfarë vlerësimi bënë ata?
A u lajmëruan banorët për gjetjet e ekspertimit?
Nëse godinat ishin vlerësuar si të rrezikshme, çfarë masash u morën për strehimin e banorëve?
Kush lejoi futjen e banorëve në pallatet e shembura në 26 Nëntor?
Qeveria ka detyrimin të sqarojë pa vonesë opinionin publik, ndërsa prokuroria ka përgjegjësinë ligjore të hetojë për të nxjerrë përgjegjësit për humbjen e jetëve të 24 qytetarëve në dy pallatet e dëmtuara në Thumanë”, shton Bardhi.