Homazhet për 21 Janarin, PS: Kush ka faturë për të larë me drejtësinë, nuk shpëton

Për të parin vit, kryeministri Edi Rama, për shkak të axhendës ndërkombëtare, nuk ishte në bulevard për të vendosur karafilat e kuq në secilën pllakatë të artë.

Shumë prej familjarëve të viktimave ishin të rezervuar. Heshtjen e kësaj dite e thyen Ana Veizi, vajza e Ziver Veizit. Për A2, ajo thotë se ka ende shpresë te organet e reja të drejtësisë.

“Kjo është një ngjarje shumë e ndërlikuar, prandaj drejtësia nuk është vendosur akoma. Megjithatë, unë kam besim ende te drejtësia, kam besim te SPAK-u. Besoj se drejtësia do të përshpejtohet tani”, shprehet Ana.

Protagonistët e protestës së 21 janarit mendojnë se janë ende në borxh me familjarët e viktimave.

Petro Koçi theksoi: “Mendoj se është shteti borxhli. Një element i rëndësishëm i shtetit është drejtësia, që mbetet e vonuar dhe nuk ka bërë asgjë për të ndëshkuar ata që dhanë urdhrat”.

Ndërsa Pjerin Ndreu u shpreh: “Ngjarjet e rënda kriminale që nuk janë zbuluar për shkak të implikimit të politikës, me drejtësinë e re do të zbardhen të gjitha. Kush ka faturë për të larë, do ta lajë. Nuk ka shpëtim”.

Më 21 janar 2011, në bulevardin “Dëshmorët e Kombit”, nga protesta e thirrur nga socialistët atëherë në opozitë, u vranë 4 protestuesit Ziver Veizi, Aleks Nika, Hekuran Deda dhe Faik Myrtaj. Kur erdhi në pushtet, qeveria Rama vendosi t’i dëmshpërblejë familjet e viktimave.