KLP shpall fillimin e procedurave për plotësimin e dy vendeve vakant për SPAK.
Arben Kraja ka propozuar emrin e drejtueses së Prokurorisë së Beratit, Eloida Goxhi, si dhe drejtuesin e Prokurorisë së Pogradecit, Sotir Kllapi, i cili po ashtu ka kaluar dy shkallët e vetting-ut. Kërkesa e drejtorit të SPAK erdhi edhe për shkak të numrit të lartë të çështjeve.
Këshilli i Lartë i Prokurorisë miratoi kërkesën e drejtuesit të SPAK Arben Kraja për të shpallur dy vakanca të cilat në SPAK do të zëvendësojnë largimin me dorëheqje e dy prokurorëve Ndini Tavani dhe Besnik Muçi.
Ndërsa deri të martën SPAK pritet të ketë edhe një tjetër emër brenda radhëve të tij, përkatësisht prokuroren Doloreza Musabelliu.
Musabelliu është në listën e miratuar më herët nga KLP për SPAK, ndërsa ka kaluar vettingun në shkallë të parë dhe të martën është afati i fundit për t’u konfirmuar edhe në shkallën e dytë të vettingut.
Edhe pse KLP kaloi në vetting që prej shtatorit të vitit të shkuar 15 prokurorë që i plotësonin kushtet për SPAK, 5 prej tyre ende nuk kanë përfunduar procesin e verifikimit duke mbajtur peng plotësimin e strukturës së posaçme. Në këtë mbledhje KLP miratoi dhe zgjatjen e afatit të drejtuesit të komanduar për 6 prokurori në rrethe.