Shiritat përreth banesave të dëmtuara nga tërmeti i 26 nëntorit ua kanë lënë vendin skelave, por rindërtimi kërkon forcë punëtore, e cila mungon në Shqipëri. Këtë boshllëk pritet ta plotësojnë mijëra të huaj nga kontinentet e largëta, të cilët do të kenë lehtësi për t’u pajisur me viza pune në vendin tonë.
Kjo u theksua në Komisionin e Sigurisë, i cili miratoi në parim projektligjin për të huajt.
Ndërsa relatori saktësoi detajet.
“Bazuar në një listë paraprake të dëmeve të shkaktuara nga tërmeti i datës 26 nëntor dhe fuqisë punëtore në vend, konsiderohet që ka pamjaftueshmëri të fuqisë punëtore”, deklaroi deputeti Sadi Vorpsi.
Përfaqësuesja e qeverisë shpjegoi se zakonisht çdo vit aplikojnë 3 mijë të huaj që kërkojnë të punësohen në Shqipëri.
“Janë mbi 3000 mijë të huaj që aplikojnë çdo vit për vizë. Afati i dhënies së lejes së punës, i cili nga 30 ditë është bërë në 10 ditë, sigurisht që nëse ka kërkesa nga punëkërkues shqiptarë, patjetër që ata do të jenë të parët, në radhën preferenciale”, u shpreh zv.ministrja Voda.
Anëtarët e komisionit kërkuan sqarime nga zv/ministrja në lidhje me sigurinë që autoritetet shqiptare ofrojnë për të identifikuar elementët e rrezikshëm që mund të vijnë nga vendet e huaja, ku morën përgjigje se Shqipëria i ka strukturat përkatëse që e garantojnë këtë siguri.