Lista e më të kërkuarve në Shqipëri, Policia publikon fotot e 3 personave të dënuar me burg përjetë

Policia e Shtetit ka publikuar 3 persona të tjerë që i shtohen listës së 50 më të mërkuarve në Shqipëri, të cilët janë objekt i punës së Njësisë së Kërkimit.

Të tre personat në fjalë janë të dënuar në mungesë me burgim të përjetshëm për vrasje dhe vepra të tjera penale.

I dënuari me burg përjetë Sokrat Ruda: Në datën 8 qershor 1995, në lagjen “Isa Boletini”, Vlorë, shtetasi Sokrat Ruda ka vrarë me armë zjarri për motive të dobëta xhelozie shtetasin Z. D. Sokrat Ruda është dënuar me burgim të përjetshëm nga Gjykata e Rrethit Gjyqësor Vlorë, për veprat penale “Vrasja me paramendim” dhe “Armëmbajtja pa leje”.

I dënuari me burg përjetë Jani Alia: Në datën 1 maj 2016, në një lokal në Tiranë, shtetasi Jani Alia ka vrarë me armë zjarri shtetasin E. Ç. Jani Alia është dënuar me burgim të përjetshëm nga Gjykata e Shkallës së Parë Tiranë, për veprën penale “Vrasja me paramendim”.

I dënuari me burg përjetë Artur Kuliçi: Në datën 6 mars 2013, në një lokal nate në Tiranë, shtetasi Artur Kuliçi, pas një konflikti me disa persona të tjerë, ka qëlluar me armë zjarri duke rrezikuar jetën e disa personave dhe si pasojë ka mbetur e vrarë me armë zjarri shtetasja S.T. Artur Kuliçi është dënuar me burgim të përjetshëm nga Gjykatës e Rrethit Gjyqësor Tiranë, për veprat penale “Vrasja në rrethana të tjera cilësuese” dhe “Armëmbajtja pa leje”.