Paketa anti-KÇK ka nxjerrë edhe një herë më shumë në pah përplasjet Qeveri-President. Ilir Meta nuk flet më vetëm për kapje të drejtësisë, por sipas tij, tentakulat e Qeverise Rama janë shtrirë edhe më tej me këtë paketë, duke bërë një grusht shteti.
“Në shtetin e PPP (Polici Parti Propagandë) nuk ekzistojnë as direktivat e BE, as Marrëveshja e Stabilizim Asocimit, as Konventat Ndërkombëtare, se kriteret e Kopenhagenit nuk i kujton më njeri që kur u mbyll Ambasada daneze këtu. Në shtetin e PPP (Polici Parti e Propagandë) ekziston vetëm grushti i shtetit dhe shpopullimi i vendit”, shkruan Meta në Facebook.
Miratimi i aktit normativ, një ditë përpara ardhjes në Tiranë të Komisionit të Venecias, për kreun e shtetit i shton dozat e pabesisë, ndërsa sekuestrimi i aseteve kriminale do të shkoje në “thesin” e Ramës, sipas Metës.
“Me miratimin në pabesi të plotë të ligjit anti-kushtetues të KRYEKÇK-së një ditë para mbërritjes në Tiranë të Komisionit të Venecias, të thirrur nga vetë Kuvendi një-partiak, nuk kanë më vlerë as thirrjet "Ndiq paratë" se tashmë paratë, pronat, çdo pasuri dhe të drejtat e shqiptarëve do përqendrohen në një grusht të vetëm, falë grushtit të shtetit që finalizohet me shndërrimin e Gjykatës Kushtetuese në Polici kushtetuese të shtetit të PPP”.
Në javën e parë të marsit, do të votohet në Parlament akti normativ, dhe disa nga ligjet që shoqërojnë paketën, që për Kryeministrin Rama, “fut thikën në zemër” të krimit të organizuar.