Karantinohet e gjithë dogana e pikës së kalimit kufitar Tushemisht. Të gjithë personat, personel dogane, policë dhe doganierë janë të izoluar në shtëpi për një periudhë 14 ditore.
Në karantinë janë vendosur edhe stafi i njësisë së kujdesit shëndetësor që shërbente në këtë doganë. Në total bëhen rreth 20 persona, 14 nga dogana dhe 6 nga stafi mjekësor.
Arsyeja e karantinimit është sepse djali i të moshuarve që dolën pozitivë me koronavirus në Korçë, punonte në këtë pikë kalimi kufitar. Ndërkohë burimet bëjnë të ditur se është karantinuar edhe një mjek në spitalin e Korçës që iu shërbeu pacientëve si edhe është bërë dezinfektim i spitalit.
Deri tani raportohet se asnjë nga personat e futur në karantinë nga punonjësit e pikës së kalimit kufitar të Tushemishtit nuk ka shfaqur simptoma.